मध्यपश्चिममा बैंकिङ गतिविधि वढ्यो

द्वन्दका कारण आर्थिक गतिविधि हुन छाडेको मध्यपश्चिममा शान्ति स्थापनासगै बैंकिङ गतिविधि वढेको छ ।

रुकुम, रोल्पा, सल्यान, प्युठान र दाङमा अहिले बैंकका शाखा धमाधम खुल्न थालेका छन् । निक्षेप संकलन तथा विदेश गएकाहरुले पठाएको पैशा सजिलै उपलब्ध गराउने उदेश्यले बैंकले शाखा विस्तार गरेका हुन् ।

दाङ उद्योग वाणिज्य सघंका अध्यक्ष चन्द्रराज पन्त बैंकहरुका कारण व्यापारिक गतिविधिमा तीब्रता आएको बताउछन ।

बैंकहरुले त्यहाको सम्भाव्यता हेरेर लगानी गर्न पनि शाखा विस्तार गरेका हुन् । शाखा विस्तारसगै प्रतिस्पर्दा पनि वढेको छ । स्थानीय स्तरमा पहिलो पटक खुलेको वेष्टर्न डेभलपमेण्ट बैंकका प्रमुख कार्यकारी अधिकृत कमलबहादुर केसीले कसरी वढी निक्षेप संकलन गर्न सकिन्छ भन्नेमा नै बैंकहरुको प्रतिस्पर्धा वढेको वताए ।

दाङको प्रमुख बजार घोराही र तुल्सीपुरमा नविल र बैंक अफ काठमाडौंले शाखा विस्तार गरेका छन् । त्यस्तैगरी चैतमा नेपाल एसबीआई बैंकले पनि शाखा विस्तार गरेको थियो भने हिमालयन बैंकले गत साता घोराहीमा शाखा खोलेको छ । शाखा उद्घाटन कार्यक्रममा दाङ आएका बैंकका अध्यक्ष मनोज बहादुर श्रेष्ठले आगामी वर्ष तुल्सीपुरमा पनि बैकको शाखा विस्तार गरिने जानकारी दिए । बैंकले साना तथा मझौला उद्यमीहरुका लागि स्थानीय तहमै लगानी गर्ने योजना बनाएको श्रेष्ठले बताए ।

स्थानीय तहमा निर्माण हुन लागेको सिमेन्ट कारखाना, कोइला खानी लगायत अन्य क्षेत्रमा लगानीको वातावरण देखेर सिद्धार्थ र एभरेष्ट बैंकले पनि आफ्नो शाखा विस्तारका क्रममा दाङ्लाई प्राथमीकतामा राखेका छन् ।

बैकिङ सेवालाई घरदैलोसम्म पुर्याउने उद्देश्यका साथ केन्द्रीय तहका वाणिज्य तथा स्थानीय विकास बैक र सहकारी संस्थाहरुले पनि सेवा विस्तारमा लागेका छन् । नयाँ लगानीका लागि संभावनायुक्त ठाउँकारुपमा दाङ विकास भइसकेको हिमालयन बैंकका श्रेष्ठले बताए । उनले स्थानीय स्रोत साधनको परिचलन नै बैंकको प्रमुख उद्देश्य रहेको उल्लेख गर्दै निक्षेप संकलन गरी स्थानीय तहमै रोजगारी सिर्जना गर्न शाखा विस्तार गरेको बताए ।

दाङमा वाणिज्य बैंकहरु खुल्न थालेपछि स्थानीय विकास बैंकहरुले नयाँ योजनाका साथै पहाडी जील्लामा पनि शाखा विस्तारको योजना वनाएका छन् । दाङको वेष्टर्न डेभलपमेण्ट बैंकले प्युठान र सल्यानमा शाखा विस्तारका लागि नेपाल राष्ट्र बैंकको अनुमति पर्खेर बसेको प्रमुख कार्यकारी अधिकृत कमलबहादुर केसीले बताए ।

त्यस्तै देउखुरी, गढवा, बेलझुण्डी र बिजौरीमा काउण्टर स्थापना गरी सर्वसाधारणलाई बैंकिङ दायरामा समेट्न लागिएको उनले बताए । नेपालगाजमा स्थापना भएका बागेश्वरी विकास बैंक, भार्गव विकास बैंक र कर्णाली विकास बैंकले पनि दाङका व्यापारिक केन्द्रहरुमा शाखा विस्तार गरेका छन् ।