किन किन्ने सनराइजको सेयर ?

विगतमा लगानीगर्दा निराश भएका सर्वसाधारणलाई एकसाता पछि अर्को अवसर सनराइज बैंकको सेयर आउने भएकॊ छ। वैशाख २० देखि सर्वसाधारणका लागि बैंकले ३७ करोड ५० लाख रुपैयाँको सेयर बिक्री गर्दैछ।

दुई महिना अघि सिटिजन्स बैंक र बैंक अफ एसियाको ६० करोडको सेयर भर्दा बैंकखाता अनिवार्य थियो। त्यसपछि धितोपत्र बोर्डले आवेदन फारममा फोटो अनिवार्य गरेपछि वास्तविक लगानीकर्तालाई सेयर पर्ने संभावना बढेको छ।

बैंकको सेयर बिक्री नभइ समय थप हुने संभावना कम छ। सिटिजन्स बैंक र बैंक अफ एसियाको ६० करोड रुपैयाँको सेयर भरेका सर्वसाधारणले करिव ११ अर्ब फिर्ता लिईरहेका छन्। यो मध्ये अधिकांश रकम फेरि सनराइज बैंकको सेयरमा पर्ने अनुमान बिक्री प्रबन्धकको छ।

साधारण लगानीकर्तालाई ३७ करोड ५० लाख रुपैयाँ बराबरको सेयर बिक्री गरेपछि बैंकको चुक्तापूँजी १ अर्व २५ करोड रुपैयाँ पुग्ने छ। यो बैंकले २०६७ सम्ममा नै दुई अर्ब रुपैयाँको चुक्तापूँजी बनाउनुपर्ने भएकोले यसले थप सेयर जारी गर्नुपर्ने हुन्छ।

बैंकले कर्मचारीका लागि एक लाख ८७ हजार पाँच सय कित्ता सेयर छुट्याईएको बिक्री प्रबन्धक एनएमबी बैंकले जनाएको छ। उद्योगपति तोलाराम दुगड बैंकका अध्यक्ष हुन भने प्रमुख कार्यकारी अधिकृतमा किशोर महर्जन छन्। महर्जन अनुभवी बैंकर हुन्। गत आर्थिक वर्ष नोक्सानीमा रहेको बैंकले चालु आवको ६ महिनामा चार करोड ६७ लाख खुद नाफा गरेको छ।