प्रभु, समवृद्धि र वैभव फाइनान्स गाभिँदै

काठमाडौं, जेठ ९

प्रभु फाइनान्स कम्पनी, समवृद्धि विकास बैंक र वैभव फाइनान्स लिमिटेड आपसमा गाभिने भएका छन्। गाभिनका लागि तीन वटै वित्तीय संस्थाबीच बिहीबार औपचारिक सम्झौता भाएको छ। 

असारभित्रै गाभिएर आगामी बर्ष एकिकृत वासलात (ब्यालेन्सिट) निकाल्ने योजना अनुसार तीन वटा फाइनान्स मर्ज भएका हुन्। मर्जरपछि नयाँ संस्थाको नाम प्रभु विकास बैंक हुने छ। 

गाभिने सम्झौतापत्रमा प्रभुका सञ्चालक तथा मर्जर समितिका संयोजक परमेश्वरलाल प्रधान, समवृद्धिका अध्यक्ष रमेशसिंह खड्का र वैभवका अध्यक्ष करुणागोविन्द श्रेष्ठले हस्ताक्षर गरेका छन्। मर्जरपछि नयाँ बैंकको अध्यक्षमा प्रभुका देवीप्रसाद भट्टचनले निरन्तरता पाउने छन्। प्रमुख कार्यकारी अधिकृतमा पनि प्रभुका अशोक शेरचन नै रहने छन्। 

सम्झौता अनुसार, मर्जरपछि नयाँ बैंकमा समवृद्धिबाट एक र वैभवबाट एक सञ्चालक रहने छन्।  वित्तीय संस्थाहरुमध्ये सबैभन्दा वढी बचत खाता रहेको प्रभुको चुक्ता पुँजी ५४ करोड ८९ करोड रुपैयाँ छ। 

तीन वटै बैंक शुक्रबार मर्जर स्वीकृतिको माग गर्दै राष्ट्र बैंक जाने छन्। प्रभु फाइनान्सले मर्जरमा जान लागेको बारे नेपाल स्टक एक्सचेन्जमा बिहीबारै जानकारी गराइ सकेको छ। वाँकी दुई वटा वित्तीय संस्थाले  सर्वसाधारणमा सेयर जारी नगरिसकेकाले स्टकको स्वीकृति लिनु पर्दैन। 

मर्जरपछि दुवै संस्थाले आफ्नो भागको साधारण सेयर जारी गर्नु पर्छ। दुवै संस्थाले ३० प्रतिशत सेयर जारि गर्नु पर्छ। अहिले वैभवको चुक्ता पुँजी १४ करोड ७० लाख रुपैयाँ छ। समवृद्धिको भने ७ करोड रुपैयाँ मात्र छ। 

'सेयर संरचना तीन वटै कम्पनीको सम्पति तथा दायित्वको मूल्यांकन (डिडिए) पछि टुङगो लाग्ने छ,' प्रभुका प्रमुख कार्यकारी अधिकृत शेरचनले भने, 'हामी एकदमै चाँडै मर्जर प्रकृया सक्ने योजनामा छौं।' 

मर्जरपछि नयाँ बैंकको निक्षेप ८ अर्ब रुपैयाँ पुग्ने छ। समवृद्धि र वैभवको गरेर करि ५० करोड रुपैयाँ हाराहारी निक्षेप छ। कर्जा लगानी ५ अर्ब ३० करोड रुपैयाँ पुग्ने छ। मर्जरपछि बैंकको शाखा संख्या ४६ पुग्ने छ। अहिले प्रभुका ४०, समवृद्धिका ५ र वैभवको  १ शाखा सञ्चालनमा छन्। समवृद्धि र प्रभुको हेटौंडा शाखा दोहोरिने छ। यो शाखालाई स्थानान्तरण गर्ने कम्पनीको योजना छ। 

मर्जरपछि कर्मचारी संख्या ३ सय ५० जनको हाराहारीमा पुग्ने छन्। अहिले प्रभुसँग ३ सय १०, समवृद्धिसँग ३० र वैभवसँग १० जना कर्मचारीहरु छन्। वैभव र समवृद्धिका प्रमुख कार्यकारी अधिकृत र वरिष्ठ कर्मचारीहरुको मिलान मर्जर समितिले गर्ने छ। 

प्रभु फाइनान्सले मर्जरका लागि …क' वर्गको वाणिज्य बैंक ग्रान्डसँग पनि औपचारिक कुराकानी गरेको थियो। नाम र मूल्यमा समेत कुरा मिलिसकेकेा अवस्थामा सञ्चालक समितिमा कम प्रतिनिधित्व हुने भएपछि प्रभुले मर्जर प्रकृया स्थगन गरेको थि यो। प्रभुले नेपाल क्रेडिट एन्ड कमर्स (एनसिसी) बैंकसँग पनि कुराकानी गरेको थियो। यही बीचमा सोसियल डेलपमेन्ट बैंकसँग पनि कुराकानी भएकेा थियो। सोसियल   ग्लोबल आइएमइ बैंकसँग गाभिने पक्का भइसकेको छ।