किष्टले थाल्यो बैंक कारोबार

ग' वर्गको वित्तीय संस्थाबाट 'क' वर्गमा स्तरोन्नति भएको किष्ट बैंकले बिहीबारदेखि औपचारिक रूपमा बैंकको कारोबार सुरु गरेको छ ।
वित्तीय संस्थाको रूपमा ६ वर्षअघि सुरु भएको किष्ट बैंकको डेपुटी गभर्नर वीरविक्रम रायमाझीले उद्घाटन गरे । निजी क्ष्ाेत्रका बैंकमध्ये सबैभन्दा बढी चुक्ता पुँजी पुर्‍याएर किष्ट स्तरोन्नति भएको हो ।
तीन करोड पुँजीबाट सुरु भएको कम्पनीले हाल दुई अर्ब रुपैयाँ चुक्ता पुँजी पुर्‍याएको छ । 'पुँजी र सन्जालमा हामी अरूभन्दा कम नहुने लक्ष्यसाथ हिँडेका छौं,' प्रबन्ध-निर्देशक कमलप्रसाद ज्ञवालीले भने ।
बैंकले आउँदो वर्षभित्र शाखा सन्जाल ५० र पाँच अर्ब रुपैयाँ पुँजी पुर्‍याउने लक्ष्य लिएको छ । हाल बैंकका २४ शाखा छन् ।

'हामी व्यापार र नाफामुखी मात्र छैनौँ,' अध्यक्ष राजेन्द्र शाक्यले भने, 'त्यसैले ग्रामीण र दुर्गम क्ष्ाेत्रमा पनि शाखा खोलेर जनतालाई बैंकिङ सेवा दिन्छौँ ।' स्थापनाकालमा सात कर्मचारी रहेको बैंकमा अहिले करिब तीन सयले रोजगारी पाएका छन् ।
६ अर्ब निक्ष्ाेप तथा साढे ६ अर्ब रुपैयाँभन्दा बढी कर्जा बैंकले प्रवाह गरेको छ भने २२ वटा एटिएम मेसिन जडान गरेको छ । डेपुटी गभर्नर वीरविक्रम रायमाझीले भने फाइनान्स कम्पनी छँदै दीर्घकालीन सोच राखेर अघि बढेकाले किष्ट परिवारले अहिले प्रगति गरेको भन्दै सन्तोष व्यक्त गरे ।
'ग वर्गको वित्तीय संस्थाको रुपमा वासेल १ बाट कारोबार गरिरहेको संस्थाले अब वासेल-२ अनुसार आफ्ना विवरण अध्यावधिक गर्नुपर्छ,' उनले भने, 'त्यसैले सुरुका वर्ष केही अप्ठ्यारो पर्न सक्छ तर यत्तिको दिगो सोच राखेर हिँड्ने व्यवस्थापनलाई त्यो चुनौती झेल्न गाह्रो हुन्न भन्ने मेरो विश्वास हो ।'
स्थापना कालदेखि नै किष्टले नाफा कमाउँदै आएको छ । स्तरोन्नति कारण खर्च बढे पनि यो वर्षसमेत नाफा कमाउने लाभांश खुवाउने प्रबन्ध सञ्चालक ज्ञवालीको दाबी छ ।