गभर्नर भन्छन्– व्याज दर बारे ग्राहकमा असन्तुष्टी धेरै छ

काठमाडौं, असोज ३– राष्ट्र बैंकका गभर्नर युवराज खतिवडाले निक्षेपमा दिने र कर्जामा लिने ब्याज दरमा प्रतिस्पर्धा भएपनि बैंकका ग्राहकमा व्याज दर बारे असन्तुष्टी वढ्दै गएको बताएका छन्। उनले ब्याज दरलाई युक्ति संगत र वस्तुगत ढङ्गले हल गर्न आवश्यक रहेको बताए।
'बैंकहरुले निक्षेपमा दिने र कर्जामा लिने व्याज दरको अन्तरलाई आदर्शतम बनाउनका लागि आधार ब्याज दर अवधारण सहयोगी हुने छ,' आधार ब्याज दर निर्धारणका बारेमा बैंकरबीच छलफल गर्दै उनले भने। उनले बैंक र ग्राहकबीच व्याज दर निर्धारणका सम्वन्धमा सँधै विरोधाभाष रहिरहनुभन्दा उपयुक्त विधिका माध्यमबाट समाधानमा जानु राम्रो हुने बताए। गभर्नरले आधार व्याज दर लागू गर्न आवश्यक भएको बताए।
छलफलमा अर्थसचिव कृष्णहरि वाँस्कोटा, डेपुटी गर्भनर महाप्रसाद अधिकारी, बैंकर्स संघका अध्यक्ष अशोक राणालगायतका बैंकरहरु सहभागी थिए।
आधार ब्याज दर बैंकको पुँजी लागत, अनिवार्य नगद मौज्दातको ऋणात्मक प्रतिफल, वैधानिक तरलता अनुपात कायम गर्न लाग्ने लागत, सञ्चालन खर्च र सम्पतिमा प्रतिफललाई आधार मानिने छ। छलफलमा राष्ट्र बैंकका कार्यकारी निर्देशक मीनवहादुर श्रेष्ठले आधार व्याज दरको अवधारण बारेमा कार्यपत्र प्रस्तुत गरेका थिए।
बैंकरहरुले आधार व्याज दर निर्धारण गर्दा प्रस्तावित वाहेक थप लागतहरुलाईसमेत ध्यान दिन आग्रह गरेका थिए। उनीहरुले लक्षित वर्गलाई प्रदान गरिने कर्जा परिभाष्ति हुनु पर्ने र पुँज्ी प्रतिफल सुनिस्चित गरिनु पर्ने बताएका थिए।