बचतबाट पुँजी निर्माण : गभर्नर

काठमाडौं, चैत ८ 

नेपाल राष्ट्र बैंकका गभर्नर युवराज खतिवडाले सानैदेखि बचत गर्ने वानी बसाएर पुँजी निर्माण गर्नु पर्ने बताएका छन्। उनले बचतबाट निर्माण भएको पुँजी परिचालन गरेर विकास निर्माण गर्दै रोजगारी वृद्धि गर्नु पर्ने बताए। 

'फाइनान्स विक सेलिव्रेसन कार्यक्रममा बिहीबार गभर्नरले भने, 'सानो–सानो बचतबाट पुँजी निर्माण हुन्छ।'

गभर्नरले अति बचत र अति उपभोगमूखि अर्थतन्त्र राम्रो नहुने बताए।  उनले उपभोगमा आधारित भएकाले नै युरोप अमेरिकाको अर्थतन्त्र समस्यामा परेको भन्दै बचतमूखि अर्थतन्त्र उत्तम हुने बताए। 

गभर्नरले वालवालिकामा बचत, यसको महत्वलगायतका बारेमा जानकारी गराउन आवश्यक भएको भन्दै राष्ट्र बैंकले पनि यसका बारेमा गृहकार्य गरिरहेको जानकारी दिए। उनले विद्यालय शिक्षादेखि नै बचत, पैसा, लगानीलगायका बारेमा जानकारी गराउनु पर्ने बताए।

'वित्तीय उपकरणको पसल थापेर मात्र हुँदैन। टोलटोलमा पुगेर यसका बारेमा जानकारी गराउनु पर्छ,' गभर्नरले भने, 'त्यसपछि मात्र यसको नतिजा आउँछ।'

गभर्नर खतिवडाले पछिल्लो समय बैंक तथा वित्तीय संस्थाहरुले वालवालिकालाई लक्षित गरि निक्षेप खाताहरु सञ्चालन गर्न थालेकोमा  खुशी व्यक्त गरे। 'वालवालिका केन्द्रित खाताहरुमा बैंकहरुले अलिवढी व्याज पनि दिन थालेका छन्,' उनले भने, 'यससँगै अन्य वित्तीय उपकरणहरु पनि उनीहरुलाई लक्षित गरेर ल्याउनु पर्छ।'

उनले वालवालिकासँग वित्तीय जानकारी गरउन राष्ट्र बैंकले 'विद्यार्थीसँग गभर्नर' नामक कार्यक्रम सञ्चालन गर्ने तयारी गरिरहेको जानकारी दिए। उनले बैंकिङ प्रणालीमा गरिने बचत सबैभन्दा सुरक्षित हुने भन्दै सानो सानो बचत पनि बैंक तथा वित्तीय संस्थामा राख्न आग्रह गरे।

'भोली अर्थतन्त्र चलाउने भनेकै आजका बालबालिकाले हो,' गभर्नरले भने, 'त्यही भएर वित्तीय उपकरण र यसका महत्वका बारेमा अहिलेबाट उनीहरुलाई वलियो बनाउनु पर्छ।'

राष्ट्र बैंकले वित्तीय साक्षरताअन्तर्गत विद्यालयका वालवालिकालाई जनचेतना फैलाउने उद्देश्यले कार्यक्रम आयोजना गरेको हो। कार्यक्रममा डेपुटी गभर्नर महाप्रसाद अधिकारीले विद्यालय तहदेखि नै वित्तीय उपकरणलगायतका बारेमा जानकारी दिन आवश्यक भएको बताए।   

कार्यक्रममा राष्ट्र बैंकका निर्देशक चिन्तामणि शिवाकोटीले कार्यपत्र प्रस्तुत गरेका थिए। कार्यक्रममा युनिसेफकी मिसाकी आकासाका उएडाले औपचारिक अनौपचारिक सवै खाले माध्यमबाट वित्तीय जनचेतना फैलाउनु पर्ने बताइन्।