अर्बपतिको बैंक खाता रोक्का

साउदी अरबको केन्द्रिय बैंकले विश्वका अर्बपतिको सूचिमा रहेका मान अल-सानियाको बैंक खाता रोक्का गरेको छ। विश्व आर्थिक मन्दीको असरमा परेका सानिया तेलको प्रमुख निर्यातकर्ता हुन्।

साउदी अरब मनिटरी एजेन्सीले सानिया र उनको परिवारको नाममा रहेको सबै बैंक खाता रोक्का गर्न गत साता निर्देशन दिएको थियो।सानिया र उनको परिवारका सदस्यले विश्वका ठूला बैंकहरुमा लगानी गरेका छन्। एचएसबीसी र सिटीग्रुप जस्ता ठूला कम्पनीहरुमा सानिया परिवारको लगानी छ।
गत मार्चमा प्रकाशित विश्वका अर्बपतिको सूचिमा सानिया ६२ नम्बरमा परेका थिए। उनको सम्पत्ति सात अर्ब अमेरिकी डलर छ।साउदी बैंकरहरुले उनको बैंक खाता रोक्का गर्नुको कारण खुलाएका छैनन्। सानिया र उनको परिवारका सदस्यहरु सानियाको लगानी रहेको साद ग्रुपले पनि यस विषयमा कुनै प्रतिकृया सार्वजनिक गरेको छैन।
बैंक खाता रोक्का हुनुलाई बहराइनमा रहेको अन्तर्राष्ट्रिय बैंकिङ कर्पोरेशन टिआईबीसी सँग जोडिएको छ । गत महिना टिआइबीसीले केही ऋणीहरुलाई कालोसूचिमा राखेको थियो । टिआइबीसी बढ्दो कमजोर ऋणको कारण सूचिकरणबाट तल झरेको छ।
यो बैंकमा साउदी अल्गोसायबी समूहको मुख्य लगानी छ। सानियाले अल्गोसायबी परिवारसँग विवाह गरेका छन्। सानियाले विगतमा यो बैंकमा प्रवन्ध साचालक पदमा रहेर काम गरेको पत्ता लागेको छ।