योजना आयोगमा खतिवडा

मन्त्रिपरिषद्को सोमबार बसको बैठकले राष्ट्रिय योजना आयोगका उपाध्यक्षमा युवराज खतिवडालाई ल्याउने निर्णय गरेको छ। नियुक्ति पछि प्रतिक्रिया दिदैं उनले दिगो शान्ति, आर्थिक विकास र अर्थतन्त्रको विस्तारका लागि प्राथमिकता दिने बताए।
झापामा जन्मेका खतिवडाले लामो समयसम्म नेपाल राष्ट्र बैंकको विभिन्न पदमा रहेर काम गरेका थिए। सेवा निवृत्त हुँदा उनी कार्यकारी निर्देशकको पदमा थिए।

उनले अर्थशास्त्रमा स्नातकोत्तर गरेका छन् भने भारतबाट मौद्रिक नीतिको विषयमा विद्यावारिधी गरेका हुन्। एमाले निकट मानिने खतिवडा मुलुकको आर्थिक क्षेत्रमा दख्खल राख्ने मध्यमा आउँछन्। उनीसँग यसअघि राष्ट्रिय योजना आयोगको सदस्य भएर काम गरेको अनुभवसमेत छ। केही महिना अघि मात्र संयुक्त राष्ट्र संघीय विकास कार्यक्रम अन्तरगत श्रीलंकामा काम गरेर उनी नेपाल फर्केका हुन्।

अहिले आउँदो आर्थिक वर्ष २०६६ / ६७ को बजेट तयार गर्ने टिममा रहेर अर्थमन्त्री सुरेन्द्र पाण्डेलाई सहयोग गरिरहेका छन् । विगतमा एमाले सरकारमा छँदा सल्लाकारको रुपमा काम गरेका उनी राष्ट्र बैंकको गभर्नरको लागि एमालेबाट प्रस्तावित व्यक्ति हुन्।