व्याज बढ्यो

काठमाडौं पुस २३
बैंकहरुलाई नगदको अभाव भएपछि उनीहरुले बचत आकर्षित गर्न निक्षेपको व्याजदर बढाएका छन् । साथै कर्जाको व्याजदर पनि बढेको छ । नगद अभावले निक्षेप आकर्षित गर्न व्याजदर बढाइएको हो-भर्खरै व्याजदर बढाएका एक बैंकका प्रमुख कार्यकारी अधिकृतले भने ।
राष्ट्र बैंकले १५ अर्ब रुपैयाँ सरकारी ऋणपत्रको धितोमा कर्जा उपलब्ध गराएपनि नगदको संकट नटरेपछि बैंक निक्षेपको व्याज बढाउन वाध्य भएका हुन् । निक्षेपको व्याज बढ्दा उपभोक्तालाई फाइदा पुग्छ ।
दशैंतिहारमा बैंकिङ प्रणालीबाट वाहिरिएको नगद फिर्ता नआएपछि उनीहरुलाई चरम नगद अभाव भएको हो । बैंकले मागेजति रकम उपलब्ध गराउन नसकेकाले सर्वसाधारणले पैसा आफैसँग राख्न थालेका हुन् ।
राष्ट्र बैंकले एक खर्व ५२ अर्ब २१ करोड रुपैयाँ वरावरको नोट निष्कासन गरेको छ । यसमध्ये चलन चल्तीमा १ खर्ब ५१ अर्ब ४७ करोड ५३ लाख रुपैयाँ वरावरको नोट हुनु पर्नेमा १२ अर्ब रुपैयाँ नोट हराएको छ । केन्द्रिय बैंकका अनुसार ७३ करोड ४६ लाख रुपैयाँ वरावरको नोट बैंकिङ कार्यालयहरुमा छ । हराएको १२ अर्ब नोट सर्वसाधारणले आफुसँगै राखेको अनुमान राष्ट्र बैंकको छ । ती नोटलाई पुनः बैंकिङ प्रणालीमा ल्याउनका लागि निक्षेपको व्याजदर बढाइएको हो । व्याज बढ्दा निक्षेप आकर्षित हुन्छ ।
नगद अभावले गर्दा निक्षेपमा सबैभन्दा वढी व्याज सिद्धार्थ बैंकले दिएको छ । बैंकले साडे १० प्रतिशत व्याज एक बर्षे मुद्दति निक्षेपका लागि निर्धारण गरेको हो । व्याजका साथै बैंकहरुले बचतकर्तालाई निशुल्क एटिएम एसएमएस बैंकिङ चेक वुकलगायतका सुविधा पनि थप्न थालेका छन् ।
परम्परागत रुपमा रहेको सरकारी बैंक कृषि विकास र नेपाल बैंकले पनि व्याजदर बढाएका छन् । कृषि विकास बैंकले यसअघि मुद्दति निक्षेपमा ६ प्रतिशतभन्दा वढी दिदैन थियो । तर नगद अभाव भएपछि उसले व्याजदर ९ प्रतिशत पुर् याएको छ । नेपाल बैंकले पनि मुद्दति निक्षेपको व्याजदर बढाएर ६ प्रतिशत पुर् याएको छ । यसअघि बैंकले साडे तीन प्रतिशत व्याज दिन्थ्यो ।
बैंकहरुसँग नगद अभाव भएपछि उनीहरुले एक आपसमा लिने सापटीको व्याज पनि बढेको छ । मंगलवार मात्र यस्तो व्याजदर साडे १४ प्रतिशत पुगेको छ । पुस मसान्तमा सबै कम्पनीले सरकारलाई राजश्व वुझाउनु पर्ने भएकाले बैंकसँग नगद अभाव अझ वढ्ने छ । यसले सापटीको व्याजदर अझ बढाउने छ ।


मुद्दति निक्षेपको व्याजदर
बैंक अहिले पहिले
नेपाल बैंक ६ ,,,,,,,,३.५
कृषि विकास ९,,,,,,,,, ६
सिद्धार्थ १०.५,,,,,, ६
बैंक अफ एसिया १०.२५,,,,, ८
डिसिबिएल १०,,,,,, ६

घरजग्गा कर्जाको व्याजदर
बैंक अहिले पहिले
नविल १३.५ ,,,,,,,,, ९
हिमालयन १३.२५,,,,,,, १०
राष्ट्रिय वाणिज्य १४,,,,,,,, ११
एभरेष्ट १०.५,,,,,,,,, १२
एनआइसी ११,,,,,,,, ९