राष्ट्र बैंकले भन्यो– विदेश जाने भए उतै डलर साट्नुस्

काठमाडौँ, भदौ १३ - नेपाल राष्ट्र बैँकले नेपालबाट विदेश भ्रमणमा जाने व्यक्तिहरुले भ्रमण गर्ने देशको मुद्रामा नै सटही गर्न अनुरोध गरेको छ। निश्चित रकमभन्दा बढी विदेशी मुद्राको हकमा यात्रु चेक, विदेशी मुद्राको प्रिपेड कार्ड र क्रेडिट कार्ड आदिबाट विदेशी विनिमय सुविधा उपयोग गर्न पनि राष्ट्र बैँकले आग्रह गरेको छ।

मुलुकमा पर्याप्त विदेशी विनिमयको संचिति रहेको दावी गर्दै बैँकले नेपालबाट विदेश भ्रमणमा जाने व्यक्तिहरुलाई यस बैंकले जारी गरेका नीतिगत व्यवस्थाको
अधीनमा रही बैंकहरुबाट तोकिएको सीमासम्म नगदमा नै विदेशी मुद्रा नियमित रुपमा उपलव्ध गराउँदै आएको बताएको छ।

'वैदेशिक भ्रमणमा जाने जो कोहीका लागि पनि आफूलाई आवश्यक पर्ने विदेशी मुद्रामध्ये सामान्य फुटकर खर्चका लागि नगदमा र अन्य भुक्तानीका लागि विदेशी मुद्राका अन्य उपकरणहरु प्रयोग गर्नु भएमा त्यस्ता उपकरणहरु नगदको तुलनामा कम जोखिमयुक्त हुनुका साथै बढी विश्वसनीय र भरपर्दा हुनाले पनि नगदको सट्टा त्यस्ता उपकरण प्रयोग गर्न प्रोत्साहित गरिन्छ' राष्ट्र बैँकले विज्ञप्तिमा भनेको छ, 'सो प्रयोजनका लागि बैंकहरुमा पर्याप्त मात्रामा बैकल्पिक उपकरणहरुको उपलव्धता रहेको व्यहोरा समेत जानकारी गराउँदछौँ।'