कृषि बैंकको सेयर विदेशीलाई बेच्न सम्पति मूल्यांकन गर्न थालियो

काठमाडौ, भदौ ११
कृषि विकास बैकमा रणनीतिक साझेदार भित्राउन सम्पत्ति मूल्यांकन सुरु भएको छ। बलियो वित्तिय संस्थाको रुपमा लैजान बैकको तीस प्रतिशत सेयर बिक्री गरेर रणनीतिक साझेदार ल्याउने तयारीका साथ सम्पत्ति मूल्यांकन सुरु भएको हो।
'बैकमा रणनीतिक साझेदार ल्याउनको लागि सम्पत्ति तथा दायित्वको मूल्यांकन सुरु हुँदैछ,' अर्थमन्त्रालय संस्थान समन्वय महाशाखाका प्रमुख खुमराज पुञ्जालीले सोमबार नागरिकसँग भने, 'यसका लागि हामीले चार्टर्ड एकाउन्टेन्ट नियुक्त गरेर काम सुरु गरिसकेका छौं।'
बैंकमा रहेको सरकारी सेयरमध्ये ३०प्रतिशत रणनीतकि राझेदारलाई दिने भने टुङ्गो लागिसकेको छ। बैकमा सरकारको ५०.७८ प्रतिशत सेयर स्वामित्वमा छ।
२०६७ कात्तिकको मन्त्रिपरिषद्को निर्णयले सरकारको स्वामित्वमा रहेको ५० प्रतिशत सेयर मध्ये ३० प्रतिशत सेयर बिक्री गरेर रणनीतिक साझेदार ल्याउने निर्णय भएको थियो।
यो निर्णय अनुसार २०६८ चैत महिनामा बसेको अर्थमन्त्री वर्षमान पुनको अध्यक्षतामा निजीकरण समितिको बैठकले बैकमा रणनीतिक साझेदार ल्याउने निर्णय अनुमोदन गर्दै संस्थान समन्वय महाशाखा प्रमुख संयोजकत्वमा उपसमिति गठन भएको थियो। समितिले ६ महिना भित्रै रणनीतिक साझेदार भिœयाउने बारे आवश्यक प्रतिवेदन तयार पार्न निर्देशन दिएको थियो।
'हामीले असोज भित्रै रणनीतिक साझेदार भित्रााउने मोडालिटीको बारेमा सबै अध्ययन प्रतिवेदन तयार पारेर बुझाउनेछौ,' उनले भने, 'रणनीतिक साझेदार कस्तो हुने लगायतका बारेमा स्पस्ट मापदण्ड तयार गर्नेछौ।'
एसियाली विकास बैंकले ग्रामिण वित्तिय क्षेत्र विकास कार्यक्रम अन्तर्गत ऋण तथा अनुदान सहयोग गर्दा कृषि विकास बैकमा रणनीतिक साझेदार भित्राउनुपर्ने शर्त राखेको छ। सरकारले एडिबीले राखेको सर्तअनुसार रणनीति साझेदार भित्राउन खोजेको हो।
एडिबीका तर्फबाट एक जना सल्लाहकार समितिमा छन्। समितिले प्रतिवेदन तयार पारेपछि त्यसका आधारमा रणनीतिक साझेदार खोजिनेेछ। 'रणनीतिक साझेदार कस्तो हुन्, उसको भूमिका कति रहनेलगायतको बारेमा समितिले सुझाव दिने छ,' पुन्जालीले भने, 'त्यसपछि रणनीतिक साझेदार भित्राउने प्रकृया सुरु हुने छ।'
बैकको ग्रामिण र कृषि क्षेत्रमा केन्द्रित कार्यक्रमलाई प्रभावित नगरी रणनीतिक साझेदार भित्राउन खोजिएको हो। एडीबीले बैकलाई पहिलो चरणमा ५० करोड ४० लाख रुपैयाँ ऋण दिएको थियो।
एडिबीले बैंकलाई ७८ करोड ३० लाख रुपैयाँ अनुदान दिने निर्णयसमेत गरेको छ। ऋण रकममध्ये ४ करोड ५० लाख रुपैयाँ प्राविधिक सहयोगका लागि छ। दोस्रो चरणको सहयोग कार्यक्रम अन्तर्गत ५७ करोड ६० लाख ऋण सहयोग र १ अर्ब ८९ करोड अनुदान दिने निर्णय गरेको छ।
पहिलो चरणको कार्यक्रम अनुसार बैकले सबै ऋण पाइसकेको छ। अनुदान भने ७२ करोड ९० लाख रुपैयाँ मात्र पाएको छ। दोस्रो चरणको सहयोग कार्यक्रम अनुसार २७ करोड रुपैयाँ मात्रै ऋण रकम पाएको छ। अनुदान वापतको २२ करोड ५० लाख रुपैयाँ मात्रै पाएको छ। बैकको ३० प्रतिशत सेयर रकम बिक्री गरेर रणनीतिक साझेदार भित्राएपछि मात्रै बाँकी ऋण र अनुदान रकम पाउने शर्त एडीबीले राखेको छ। एडीबीले दिएको अनुदानमा बैकको पूर्वाधार सफ्टवेयर, कम्प्युटर, फर्निचर र तालिमका लागि दिएको हो।