नबिलले सुरु गर्‍यो अनलाइनबाट किनमेल र भुक्तानी सेवा

काठमाडौं, मंसिर १०
नबिल बैंकले अनलाइनबाट किनमेल तथा भुक्तानी सुविधा भएको 'इसेक्योर' सेवा सुरु गरेको छ। बैंकका डेबिट, क्रेडिट र प्रिपेड कार्ड भएका ग्राहकले घरै बसेर अनलाइनबाट उपलब्ध बस्तु तथा सेवा खरीद गर्न सक्ने छन्।
नयाँ सेवामार्फत बैंकका डलर खाता भएका ग्राहकले डलरमा र नेपाली रुपैयाँमा खाता भएका ग्राहकले भारतीय र नेपाली मुद्रामा अनलाइनमार्फ किनमेल गर्न सक्छन्। अनलाइनमार्फत कारोबार र भुक्तानी सेवा दिने नबिल  नेपालकै पहिलो संस्था हो। यसअघि अनलाइनमार्फत कारोबार भएपनि भुक्तानी भने नगदमा नै गर्नु पर्थियो।
कारोवारको प्रत्यक्ष नियमन थि्रडि प्रणालीमा आधारित भएर ‘एक्सेस कन्ट्रोल सर्भर’ र्माफत भिसा र मास्टरर्काडले गर्ने भएकाले कुनै जोखिम नरहेको बैंकले जनाएको छ। 'बैंकका सवै कार्ड वाहकहरुले यो सुविधा प्रयोग गर्न सक्छन्,' प्रमुख कार्यकारी अधिकृत अनिल ज्ञवालीले आइतवार आयोजित पत्रकार सम्मेलनमा भने, 'अनलाइनमार्फत हुने किनबेच तथा कारोबार एकदमै सुरक्षित र भरपर्दो छ।'
इसेक्योर सेवा लिन र्काडधनीहरुले बैंकको वेव साइटमा गएर आफ्नो खाता (युजर एकाउन्ट) रजिष्टर गर्नु पर्छ। एटिएम कार्डमा दिइने पिनको प्रयोग हुने भएकाले सम्वन्धित ग्राहक वाहेक अरु कसैले यसको प्रयोग गर्न नसक्ने उनले जानकारी दिए।
बैंकका अहिले २ लाख डेबिट कार्ड र २० हजार क्रेडिट कार्ड प्रयोगकर्ता छन्।
इसेक्योरको प्रयोगबाट नेपालभित्रै जहाजको टिकेट, वस्तु तथा सेवाको खरिदजस्ता कारोबार गर्न सकिन्छ। साधारण कार्ड हुनेहरुले पनि भारतीय बजारमा पाइने बस्तु तथा सेवा खरिद गर्न सक्छन्। भारतवाहेकका मुलुकबाट सामान खरिद गर्न भने डलर खाता चाहिन्छ। राष्ट्र बैंकका अनुसार, डलरमा आम्दानी गर्ने र विदेश भ्रमणमा गएकाहरुले मात्र डलर खाता खोल्न पाउँछन्।
यो सेवा प्रयोगका लागि सुरुमा रजिष्ट्रेशन शुल्क वापत ५० रुपैयाँ लाग्छ। वार्षिक शुल्क एक सय रुपैयाँ लाग्छ। यस वाहेक  प्रत्येक कारोबारमा खरिद मूल्यको ०.५ प्रतिशत वा ५० रुपैयाँमध्ये जुन वढी हुन्छ त्यति बराबरको रकम शुल्क लाग्ने छ। 'कम शुल्कमा घरैमा बसेर बस्तु तथा सेवाको  किनमेल गर्न सकिन्छ,' ज्ञवालीले भने, 'बजारसम्म पुग्ने समय र यातायात खर्च बचत हुन्छ।'
पछिल्लो समय आफै गएर बस्तु  तथा सामान खरिद गर्दा भन्दा अनलाइनमार्फत किन्न जाँदा सस्तो पाइने गरेको छ। अनलाइकमार्फत किनमेल गर्दा नगद वोक्दा हुने जोखिमबाट जोगिन सकिन्छ।
नबिल नेपालमा पहिलो पटक कार्ड सेवा सुरु गर्ने बैंकसमेत हो। 'नविलले इन्टरनेट मार्फत आफ्ना ग्राहकलाई विश्वभर खरिद अवसर प्रदानसमेत पहिलो बैंक बनेको छ,' ज्ञवालीले भने, 'ग्राहकका आवश्यकता अनुसार सेवा र सुविधा अझ वढाएर लैजान्छौं।'
बैंकले ग्राहकको सुरक्षाका लागि दैनिक अधिकतम २ लाख रुपैयाँ र वढीमा पाँच वटा कारोबार गर्ने व्यवस्था गरेको छ। कारोबार भएको जानकारी एसएमएस अलर्टमार्फत पाइने छ। बैंकले इसेक्योर सेवा लिन इच्छुक ग्राहकका लागि आफ्नो अनलाइनमा 'लिंक' राखिदिएको छ। ग्राहकले रजिस्ट्रर्ड गर्ने वित्तिकै कारोबार गर्न सक्छन्। तर, डलर खाता भएकहरुले भने २४ घण्टा पर्खनु पर्ने हुन्छ।