एनडिइपी र हामा गाभिने

काठमाडौं, कात्तिक २३
एनडिइपी डेभलपमेन्ट बैंक र हामा मर्चेन्ट एन्ड फाइनान्स कम्पनी आपसमा गाभिने भएका छन्। दुवै संस्थाले ६ महिनाभित्र गाभिने गरी सम्झौतापत्रमा हस्ताक्षर गरेका छन्।
सम्झौतासँगै दुवै संस्थाले बिहीबारै नेपाल स्टक एक्सचेन्ज (नेप्से) मा सेयर कारोबार रोका गरेका छन्। मर्जर सम्झौतापत्रमा दुवै संस्थाका सञ्चालक समिति अध्यक्षहरुले हस्ताक्षर गरेका छन्।
मर्जरपछि नयाँ संस्थाको पुँजी ७९ करोड रुपैयाँ पुग्ने छ। दुवै संस्थाको संस्थापकहरु एक समुहका भएकाले मर्जरमा जाने सम्झौता भएको हो। राष्ट्र बैंकले पनि दुई संस्थालाई मर्जरमा जान दवाव दिँदै आएको थियो। 'मर्जरमा जाने संझौतापछि दुवै संस्थाले राष्ट्र बैंकमा स्वीकृतिका लागि बिहीबारै आवेदन दिएका छौं,' एनडिइपी बैंकका प्रमुख व्यवस्थापक किरण घिमिरेले नागरिकसँग भने।
मर्जरपछि दुवै संस्थाका कर्मचारीको संख्या २ सय २० जना पुग्ने छ। एनडिइपीसँग शाखा सञ्जाल राम्रो छ। हामाको भने एउटा मात्र कार्यलय छ। एनडिइपीका हाल २२ शाखा सञ्चालनमा छन्। बैंकले थप चार शाखा खोल्नका लागि राष्ट्र बैंकसँग स्विकृति लिइसकेको छ।
कुन बैंक कति हैसियतमा मर्ज हुने टुङ्गो भने सम्पूर्ण सम्पति तथा दायित्वको मूल्याङकनपछि टुङ्गो लगाइने घिमिरेले जानकारी दिए। मूल्यांकन प्रतिवेदनका आधारमा दुवै संस्थाको सेयर स्वाप अनुपात निर्धारण हुने छ।