लघुवित्त संस्था खोल्न कडाइ

काठमाडौं, असोज २८
राष्ट्र बैंकले वाणिज्य बैंकहरुलाई लघुवित्त विकास बैंक खोल्न कडाइ गरेको छ। एक क्षेत्रमा लघुवित्त संस्थाहरु धेरै खुलेर एउटै ग्राहकमा ऋण दोहोरिन थालेपछि राष्ट्र बैंकले खोल्न कडाइ गरेको हो। सर्वसाधारणहरुले भने खोल्न पाउने छन्।
राष्ट्र बैंकले मनाङ, हुम्ला, डोल्पा, कालिकोट, मुगु, जाजरकोट, वझाङ, वाजुरा र दार्चुला वाहेक अन्य जिल्लामा नयाँ लघुवित्त बैंक खोल्न स्वीकृति नदिने भएको हो। वित्तीय पहुँच कम भएका यि ९ जिल्ला वाहेक अब अन्य जिल्लामा नयाँ लघुवित्त बैंक खोल्न पाइने छैन। यसअघि नै राष्ट्र बैंकमा आवेदन दिइसकेकाहरुले भने स्विकृति पाउने छन्। यि संस्थाहरुले नौं जिल्लामा प्राथमिक पुँजीको ५ गुणासम्म सर्वसाधारणबाट निक्षेप संकलन गर्न पाउने छौं।
'नौं जिल्लामा पहुँच विस्तार होस् भनेर त्यसलाई प्राथमिकतामा राखिएको हो,' राष्ट्र बैंकका प्रवक्ता भाष्करमणी ज्ञवालीले आइतबार नागरिकसँग भने। राष्ट्र बैंकले यसअघि ३० जिल्लालाई प्राथमिकतामा राख्दै लघुवित्त संस्था खोल्न छुट दिएको थियो। '३० जिल्लामध्ये १७ जिल्लामा वित्तीय पहुँच सन्तोषजनक छ,' उनले भने। राष्ट्र बैंकले यि १७ जिल्लामा संस्था खोल्नेलाई शुन्य व्याज दरमा ऋण उपलब्ध गराउने छ।
विपन्न वर्गमा लगानी गरेर गरिवी निवारण गर्ने उद्देश्यले राष्ट्र बैंकले निकै प्राथमिकताका साथ लघुवित्त संस्था खोल्नलाई प्रोत्साहित गर्दै आएको थियो। उसले वित्तीय पहुँच वढाउन बैंकहरुलाई भगिनी संस्थाका रुपमा लगानी गरेर पनि लघुवित्त सञ्चालन गर्न छुट दिएको थियो।