बैंकर संघ अध्यक्षमा भन्डारी निर्विरोध

सुदर्शन सापकोटा
काठमाडौं, मंसिर २०
वाणिज्य बैंकहरुको छाता संगठन नेपाल बैंकर्स संघको अध्यक्षमा सिटिजन्स् बैंकका प्रमुख कार्यकारी अधिकृत राजनसिंह भन्डारी निर्विरोध निर्वाचित भएका छन्। उमेद्वारी दर्ता गराउने अन्तिम समय वुधबार साँझसम्म भन्डारीवहेक कसैले पनि उमेद्वारी नदिएपछि उनी निर्विरोध भएका हुन्।
संघले निर्वाचनको कार्यक्रम शुक्रबार राखेको छ। कसैको पनि उमेद्वारी नपरेका कारण निर्वाचन समितिले शुक्रबार भन्डारी अध्यक्ष निर्वाचित भएको घोषण गर्ने छ।
भन्डारीले संघको अध्यक्ष पदका लागि १० दिनअघि नै आवेदन दर्ता गराइसकेका थिए। अघिल्लो निर्वाचनमा प्रतिस्पर्धा हुँदा बैंकरबीच गुट बनेपछि यसपाली निर्विरोध गएिको हो।
अघिल्लो वर्ष एनआइसी बैंकका प्रमुख कार्यकारी अधिकृत शशिन जोशी र हिमालयन बैंकका प्रमुख कार्यकारी अधिकृत अशोक राणाबीच प्रतिस्पर्धा भएको थियो। यो प्रतिस्पर्धापछि बैंकरबीच फुट भएकाले यसपाली अध्यक्ष निर्विरोध बनाइएको एक बैंकरले जनाकारी दिए।
वर्तमान अध्यक्ष अशोक राणाले एक कार्यकालभन्दा अर्को नदोहोर्‍याउने भन्दै दुई वर्षअघिको चुनाव जितेका कारण भन्डारीलाई अझ सजिलो भएको हो। अघिल्लो निर्वाचनमा प्रतिस्पर्धा भएर बैंकरबीच फाटो उत्पन्न भएपछि यसपाली एकिकृत रुपमा जाने भन्दै निर्विरोध अध्यक्ष छान्ने पक्षमा सबै बैंकर एकमत भएको स्रोतले जानकारी दियो।
संघका एक वर्ष अध्यक्ष र अर्को वर्ष उपाध्यक्षसहित अन्य सदस्यको निर्वाचन हुने परम्परा छ। यही व्यवस्थाका कारण यसपाली अध्यक्षको मात्र निर्वाचन भएको हो। वर्तमान कार्यसमितिमा उपाध्यक्ष रहेका भन्डारी अध्यक्षमा गएपछि एउटा उपाध्यक्ष पद खाली हुने छ। अर्को उपाध्यक्षमा एनएमबी बैंकका प्रमुख कार्यकारी अधिकृत उपेन्द्र पौडेल छन्।
संघमा ३२ वटै वाणिज्य बैंक र २ वटा विकास बैंक सदस्य छन्। विकास बैंकका तर्फबाट एसडेभलपमेन्ट बैंक र एनआइडिसी डेभलपमन्ट बैंक सदस्य छन्। खारेजीमा गइसकेको नेपाल विकास बैंक पनि सदस्य थियो।
राजनसिंह अध्यक्षमा निर्विरोध निर्वाचित भएसँगै खाली भएको उपाध्यक्ष पदमा कसलाई लैजाने भन्ने बारेमा छलफल भइरहेको छ। उनको अध्यक्षमा हुने पहिलो कार्यसमितिको वैठकले एक जनालाई उपाध्यक्षमा मनोनित गर्न सक्ने व्यवस्था छ। 'यसअघि खाली भएको उपाध्यक्ष पद त्यतिकै छाडिदिने व्यवस्थाका कारण यसपाली मनोनय नहोला,' एक बैंकरले भने,'तर सहमति भएमा उपाध्यक्ष चयन गर्न पनि सकिन्छ।'
भन्डारी राष्ट्र बैंकका पूर्वकर्मचारी पनि हुन्। उनले कार्यकारी निर्देशकबाट राजिनामा गरेर सिटिजन्स् बैंकमा आएका हुन्।
राष्ट्र बैंकका पूर्वकर्मचारी भएपनि उनी विभिन्न गुटका बैंकरहरुबीचको सबै समुहमा 'पपुलर' रहेको एक बैंकरले बताए। स्रोतका अनुसार, अहिले सञ्चालनमा रहेका बाणिज्य बैंकहरुमा तीन वटा समुह छ। एउटा स्ट््यान्डर्ड चार्टर्डबाट करियर सुरु गरेका, अर्को राष्ट्र बैंकका पूर्वकर्मचारी, त्यसपछि हिमालयन बैंकको स्कुलिङबाट हुर्किएकाहरुको समुह छ। विदेशी बैंकका सिइओहरुले स्ट्यान्डर्ड चार्टर्डका उत्पादनहरुलाई नै सघाउँदै आएका छन्। 
'राष्ट्र बैंकका पूर्वकर्मचारी भएकाले भन्डारीले नियामक निकाय र बैंकरबीच फराकिलो हुँदै गएको सम्बन्धलाई सुधार्न सक्छन्,' एक बैंकरले भने, 'वढ्दो दुरीलाई कम गर्न सके उनको कार्यकालको यो नै ठूलो उपलब्धि हुने छ।'