गुड फर पेमेन्टमा दुई जनाको हस्ताक्षर अनिवार्य

काठमाडौं, पुस ७
नेपाल राष्ट्र बैंकले गुड फर पेमेन्ट चेक जारी गर्दा त्यसमा कम्तिमा दुई जना कर्मचारीले हस्ताक्षर गर्नु पर्ने व्यवस्था गरेको छ। एच एन्ड बी बैंकमा गुड फर पेमेन्ट चेकका कारण ठूलो ठगी भएपछि राष्ट्र बैंकले यसलाई नियन्त्रण गर्न नयाँ व्यवस्था थप गरेको हो
राष्ट्र बैंकका अनुसार, गुड फर पेमेन्ट चेक जारी गर्ने कार्यालयका कम्तिमा दुई कर्मचारीले आफ्नो कोडसहित नाम, पद र मिति खुलाइ हस्ताक्षर गर्नु पर्ने हुन्छ।
गुड फर पेमेन्ट  चेकको धितो राखेर ऋण लिन/दिन नापाइने व्यवस्थासमेत गरिएको छ। यस्तो चेकको धितोमा सजिलै ऋण दिएका कारण एच एन्ड बी कान्डमा केही सहकारी संस्थाहरुको ठूलो रकम डुवेको छ। राष्ट्र बैंकले यस्तो चेक जारी गर्न केही कडाइ गर्दै आन्तरिक नियन्त्रण प्रणाली बलियो बनाउनसमेत बैंक तथा वित्तीय संस्थालाई निर्देशन दिएको छ। गुड फर पेमेन्ट चेक जारी गर्नेले यसको जानकारी प्रमुख सञ्चलन अधिकृतलाई अनिवार्य रुपमा उपलब्ध गराउनु पर्ने व्यवस्थासमेत गरिएको छ।
राष्ट्र बैंकले यस्तो चेकको मिति गुड ्करक पेमेन्ट गरेको मितिभन्दा पछिको हुन नहुनेसमेत व्यवस्था गरेको छ। गुड फर पेमेन्ट गर्ने बैंक तथा वित्तीय संस्थाले चेकमा उल्लेख भए बराबरको रकम सम्वन्धित खातामा आन्तरिक प्रणालीबाटै इयर मार्क (दायित्व निर्वाह) हुने गरी स्वचालित रुपमा चेकमा वा चेकसँग उपलब्ध गराउने व्यवस्था गर्नु पर्ने समेत निर्देशन छ। सम्वन्धित बैंक तथा वित्तीय संस्थालाई यसको अभिलेख राख्नसमेत राष्ट्र बैंकले निर्देशन दिएको छ।