काठमाडौं, चैत १
राइजिङ डेभलपमेन्ट बैंकमा खेमराज भेटवाललाई नियम मिचेर प्रमुख कार्यकारी अधिकृता बनाइएको भन्दै अदालतले उनलाई काममा नलगाउन अन्तरिम आदेश दिएको छ। राष्ट्र बैंकका कर्मचारीसमेत रहेका भेटवाललाई नियम मिचेर प्रमुख कार्यकारी अधिकृत बनाइएको भन्दै बैंकका तीन जना सञ्चालकले अन्तरिम आदेश माग गरेका थिए।
सातमध्ये तीन सञ्चालकले वुधबार हेटौंडा पुनरावेदन अदालतसँग अन्तरिम आदेश जारि गर्न निवेदन दिएका थिए। उनीहरुको निवेदनमा बिहीबार सुनुवाइ गर्दै अदालतले प्रमुख कार्यकारीमा भेटवाललाई काममा नलगाउन अन्तरिम आदेश दिएको हो।
सञ्चालकहरु रामजीप्रसाद अधिकारी, छविलाल कडेँल र जगन्नाथ पौडेलले अदालतसँग अन्तरिम आदेश माग गरेका थिए। अन्तरिम आदेश माग गर्नेमध्येका एक सञ्चालक अधिकारीले चार सञ्चालकहरुले कार्यालय वाहिर माइन्युट गरेर भेटवाललाई प्रमुख कार्यकारी बनाएकाले अदालत जानु परेको बताए।
'सातमध्ये तीन जना सञ्चालकलाई निर्णय प्रकृयाबाट अलग्याएर भेटवाललाई नियुक्त गरिएको थियो,' उनले नागरिकसँग भने, 'प्रकृया मिचेर नियुक्ती दिइएकाले अदालत गएका हौं।' नारायणगढको सहिद चौंकमा कर्पोरेट कार्यालय रहेको बैंकको सञ्चालक समिति अध्यक्षमा गोविन्दप्रसाद जोशी छन्। वाँकी सञ्चालकमा चन्द्रेश्वर भट्टराई, देशीराम प्रधान र महेश प्रधान छन्।
२० करोड रुपैयाँ चुक्ता पुँजी रहेको बैंकमा सर्वसाधारणको १ अर्ब १० करोड निक्षेप छ। बैंकले ९३ करोड रुपैयाँ ऋण लगानी गरेको छ। गत पुसमा बैंकले १ करोड १८ लाख नाफा गरेको थियो। बैंकको प्रति सेयर आम्दानी करिव १२ रुपैयाँ छ।
No comments:
Post a Comment
thanks for comment