गत वर्ष अधिकांश वाणिज्य बैंकले मुद्दती निक्षेपमा ब्याजदर बढाएका छन् । नेपाल राष्ट्र बैंकले सार्वजनिक गरेको गत चैतसम्मको ब्याजदर तथ्यांकअनुसार वाणिज्य बैंकले एक वर्षे मुद्दती निक्षेपमा पाँचदेखि साढे सात प्रतिशत ब्याज दिएका छन् ।
तर, एक बर्षभन्दा बढी समयको निक्षेपमा बैंकहरूले पौने आठ प्रतिशतसम्म ब्याज दिएका राष्ट्र बैंकको तथ्यांकमा उल्लेख छ ।नयाँवर्ष लागेपछि बैंकहरूले ब्याजदर बढाउने क्रम झनै तीव्र भएको छ । हालै सनराइज बैंकले साढे नौ प्रतिशतसम्म ब्याज दिने घोषणा गरेको छ ।
सो योजनमा न्यूनतम पाँच लाख रुपैयाँ जम्मा गर्नुपर्छ । यसैगरी ६ महिनाअघि एनआईसी बैंकले पनि न्यूनतम निक्षेप रकम तोकी नौ प्रतिशत ब्याज दिने घोषणा गरेको थियो ।बैंकहरूबीच ब्याजदर बढाउने होडबाजीले बैंकिङ प्रणालीमा पर्याप्त तरलता अपुग भएको संकेत गरेको छ ।
ठूला निक्षेपकर्ता कर्मचारी सञ्चयकोष, नागरिक लगानीकोष र राष्ट्रिय बीमा संस्थानले जलविद्युत् परियोजनामा लगानी गर्ने घोषणा गरेलगत्तै ब्याजदरमा वृद्धि गरेका हुन् । यी संस्थाले नेपाल विद्युत् प्राधिकरणले निर्माण गर्न लागेको माथिल्लो तामाकोसी परियोजनामा लगानी गर्न लागेका हुन् ।
गत वर्ष कृषि विकास बैंकले सबैभन्दा उच्च दरमा ब्याज बढाएको थियो । गत माघमा बैंकले एकवर्षे मुद्दती निक्षेपको ब्याजदर सात प्रतिशत पुर्याएको थियो ।
त्यसअघि ब्याजदर साढे तीन प्रतिशत थियो । गत असारसम्म ब्याजदर साढे चार प्रतिशत रहेको सिद्धार्थ बैंकले ६ प्रतिशत पुर्याएको छ । यसैगरी पौने पाँच प्रतिशत ब्याज दिइरहेको सिटिजन्स बैंकले गत साउनमा एक वर्षे मुद्दती ब्याजदर ६ प्रतिशत पुर्याएको थियो । त्यस्तै बैंक अफ एसियाले पनि गत साउनमै सवा ६ देखि सवा सात प्रतिशतसम्म ब्याज दिन थालेको हो ।
त्यसपूर्व सो बैंकले पौने ६ प्रतिशत ब्याज दिने गरेको थियो ।सवा चार प्रतिशत ब्याज दिइरहेको सनराइज बैंकले गत फागुनमा पौने पाँच प्रतिशत ब्याज दिन थालेको छ । माछापुच्छ्रे बैंकले गत कात्तिकसम्म दिएको सवा पाँच प्रतिशत ब्याजलाई ६ प्रतिशत पुर्याएको थियो ।कुमारी बैंकले पनि गत साउनमा ब्याजदर पाँच प्रतिशतबाट पाँचदेखि साढे पाँच प्रतिशत पुर्याएको थियो । लक्ष्मी बैंकले गत चैतमा ब्याजदर पौने ६ देखि साढे सात प्रतिशतसम्म पुर्याएको छ ।
त्यसअघि सो बैंकले सवा ६ देखि पौने सात प्रतिशत ब्याज दिने गरेको थियो । यसैगरी नेपाल एसबिआई बैंकले गत मंसिरमा ब्याजदर पाँच प्रतिशतबाट साढे पाँच प्रतिशत पुर्याएको थियो । प्राइम कमर्सियल बैंकले गत कात्तिकमा ब्याजदर साढे ६ बाट पौने सात प्रतिशत पुर्याएको छ ।दस बैंकले औद्योगिक कर्जा दिने२५ वटा वाणिज्य बैंकमध्ये दशवटा बैंकले मात्र औद्योगिक कर्जा प्रवाह गरेका छन् । नेपाल राष्ट्र बैंकले सार्वजनिक गरेको वाणिज्य बैंकको ब्याजदर संरचना तथ्यांकअनुसार बैंकहरूले सातदेखि १३ प्रतिशत ब्याज लिएका छन् ।
सबैभन्दा कम ब्याजमा ग्लोबल बैंक र सबैभन्दा बढी ब्याजमा बैंक अफ काठमाण्डुले औद्योगिक कर्जा प्रवाह गरेका छन् । ग्लोबल बैंकले सातदेखि सवा ११ प्रतिशत ब्याजदरमा कर्जा प्रवाह गरेको छ भने बैंक अफ काठमाण्डुले १२ देखि १३ प्रतिशत ब्याजमा कर्जा प्रवाह गरेको छ ।गत वर्ष औद्योगिक कर्जाको ब्याजदर कृषि विकास बैंकले मात्र वृद्धि गरेको छ । गत माघमा बैंकले ब्याजदर साढे नौदेखि १० प्रतिशतबाट बढाएर दशदेखि साढे १० प्रतिशत पुर्याएको थियो । गत माघमै स्ट्यान्डर्ड चार्टर्ड बैंकले भने ब्याजदर घटाएको थियो ।
उसले ब्याजदर दशदेखि साढे ११ प्रतिशतबाट दशदेखि ११ प्रतिशत कायम गरेको छ । लुम्बिनी बैंकले यस्तो कर्जा आठदेखि साढे ११, कुमारी बैंकले दशदेखि १२ र सिद्धार्थ बैंकले आठदेखि साढे दश प्रतिशत ब्याजमा प्रवाह गरेका छन् ।
यसैगरी औद्योगिक कर्जामा नेपाल एसबिआई बैंकले साढे नौदेखि ११, नेपाल बंगलादेश बैंकले १० देखि साढे १० र एभरेष्ट बैंकले आठदेखि ११ प्रतिशत ब्याजदर तोकेका छन् ।
No comments:
Post a Comment
thanks for comment