नेसनल र नारायणी फाइनान्स गाभिए

वित्तीय क्षेत्रमा दैनिकजसो कुनै न कुनै बैंक तथा वित्तीय संस्थाको शाखा विस्तार भइरहेको अवस्थामा काठमाडांैमा रहेको नेसनल फाइनान्स लिमिटेड र चितवनमा रहेको नारायणी फाइनान्स लिमिटेड एक-आपसमा मर्ज -गाभिएका) भएका छन् ।
आइतबार दुवै फाइनान्सले संयुक्त विशेष साधारणसभा गरी गाभिएको घोषणा गरेका हुन् । मर्जपछि संस्थाको नाम नारायणी नेसनल फाइनान्स राख्ने सहमति भएको छ ।
विगत लामो समयदेखि गाभिनका लागि गृहकार्यमा लागेका यी दुई फाइनान्स कम्पनीलाई हालै राष्ट्र बैंकले मर्ज हुन स्वीकृति दिएपछि आइतबार गाभिएको घोषणा गरेका हुन् ।
नेपालको वित्तीय क्षेत्रमा दुईवटा संस्थाहरू एक-आपसमा गाभिएको यो पहिलोपटक हो । अहिले 'क' वर्गको वाणिज्य बैंक र 'ख' वर्गको विकास बैंक खोल्ने बाढी आउन थालेकाले बजारमा प्रतिस्पर्धा गर्न 'ग' वर्गमा रहेका नारायणी र नेसनल फाइनान्स गाभिएका हुन् ।

सन् २०१० के जनवरीदेखि नेपालले विश्व व्यापार संगठनको प्रावधानअनुसार विदेशी बैंकहरूले नेपालमा शाखा विस्तार गर्न सक्ने भएकाले आफ्नो शाखा खोल्न पाउन प्रावधान रहेकाले प्रतिस्पर्धा बढ्ने भएकाले राष्ट्र बैंकले नेपालका बैंक तथा वित्तीय संस्थाहरूलाई प्रतिस्पर्धी क्षमता बढाउन र सञ्चालन खर्च कम गर्न मर्ज हुन सक्ने व्यवस्था गरेको छ ।
मर्ज भएको जानकारी दिन आइतबार आयोजित कार्यक्रममा संयुक्त सञ्चालक समितिका तर्फबाट अध्यक्ष रामकृष्ण मानन्धरले गाभिएपछि नाराणयी नेसनल फाइनान्सले पुँजी वृद्धि गरी 'ख' वर्गको विकास बैंकमा परिणत हुने घोषणा गरे । उनले तत्काललाई 'ख' वर्गको विकास बैंकमा परिणत हुने दीर्घकालीन रूपमा 'क' वर्गका वाणिज्य बैंकमा परिणत हुने लक्ष्य रहेको जानकारी दिए ।

नारायणी नेसनल फाइनान्सले विकास बैंकमा परिणत हुनेको लागि हकप्रद सेयर निष्काशन गरी पुँजी वृद्धि गर्ने घोषणासमेत गरेको छ । दुवै वित्तीय संस्थाहरू एक-आपसमा गाभिएपछि नारायणी नेसलन फाइनान्सको चुक्त पुँजी ४४ करोड रुपैयाँ पुगेको छ भने जगेडा कोषमा १४ करोड रुपैयाँ रहेको छ ।
फाइनान्सको २०६५ साल चैत मसान्तसम्मको अपरिष्कृत वित्तीय विवरणअनुसार एक अरब ५३ करोड रुपैयाँ कर्जा लगानी भएको छ भने एक अरब ५६ करोड रुपैयाँ निक्षेप संकलन भएको छ । फाइनान्सको खुद नाफा चार करोड रुपैयाँ रहेको छ ।