भिबोरको सेयर

भिबोर विकास बैंकले जेठ अन्तिम साता सर्वसाधारण सेयर बिक्री गर्ने भएको छ । बैंकले २७ जेठदेखि पाँच दिनका लागि बिक्री खुला गर्ने गरी विवरणपत्र सोमबार प्रकाशित गरेको छ ।
निष्कासन तथा बिक्री प्रबन्धक एनएमबी बैंकमार्फत एक सय रुपैयाँ दरको २६ लाख ५२ हजार कित्ता सर्वसाधारण सेयर जारी गर्न लागेको हो ।
पुस मसान्तसम्मको विवरणअनुसार बैंकको प्रतिसेयर नेटवर्थ ८९.२१ रुपैयाँ छ भने खुद नोक्सान एक करोड ३९ लाख १६ हजार छ । चालू आर्थिक वर्षको अन्त्यसम्ममा त्यसलाई ४७ लाख ४८ हजारमा झार्ने बैंकको लक्ष्य छ ।

दुई अर्ब चार करोड अधिकृत पुँजी रहेको बैंकको चुक्ता पुँजी ४१ करोड रुपैयाँ छ । सर्वसाधारण सेयर बिक्रीपश्चात् बढेर ६८ करोड पुग्नेछ । एक महिनाबीचमा सेयर निष्कासन गर्ने यो तेस्रो कम्पनी हो । यसअघि सनराइज बैंकले ३७ लाख ५० हजार, प्राइम बैंकले ३० लाख कित्ता सेयर बिक्री गरेका छन् ।
ती दुई कम्पनीको सेयरका लागि १७ अर्ब रुपैयाँ भन्दा बढीको आवेदन परेको छ ।