उच्चपदस्थतको विवरण चित्त वुझे मात्र खाता खोल्नु पर्ने

काठमाडौं, मंसिर २६

नेपाल राष्ट्र बैंकले सम्पति सुद्धीकरण नीतिलाई थप व्यवस्थित गर्दै उच्च पदस्थ व्यक्तिहरुको व्यक्तिगत विवरणमा चित्त वुझेमात्र बैंक खाता खोल्न निर्देशन दिएको छ। पदीय हैसियत तथा ख्यातिका हिसावले मात्र बैंक खाता खोल्दा जोखिम हुन सक्ने भएकाले राष्ट्र बैंकले उच्च पदस्थ व्यक्तिको विवरणमा चित्त वुझे मात्र खाता खोल्न निर्देशन दिएको हो।

राष्ट्र बैंकले पुरानै निर्देशिकालाई शंसोधन गर्दै केही वुँदाहरु थप गरेर बुधबार नयाँ निर्देशन जारी गरेको हो। नयाँ निर्देशनमा बैंक तथा वित्तीय संस्थाहरुले भौगोलिक क्षेत्र, व्यवसाय, पेशा, कार्यक्षेत्र, ग्राहक, सेवा, उत्पादन, कारोबार तथा वितरण माध्यमसमेतका आधारमा सम्पति सुद्धीकरण तथा आतङकवादी कृयाकलापमा वित्तीय लगानी सम्वन्धि जोखिमको पहिचान तथा मूल्यांकन गर्नु पर्ने वुँदा थप गरिएको छ।

राष्ट्र बैंकले जोखिमको पहिचान तथा मूल्यांकन गर्दा राष्ट्रिय  जोखिम मूल्यांकन समेतलाई आधार बनाउनु पर्ने तथा जोखिमसँग सम्वन्धित सबै पक्षहरुको विश्लेषण गरी त्यसको स्तर निर्धारण गर्न निर्देशन दिएको छ। राष्ट्र बैंकले पहिचान  भएको जोखिमको स्तर अनुरुप ग्राहक पहिचान व्यवस्थापन तथा न्यूनीकरण गर्नका लागि आवश्यक पर्ने नीतिगत, कार्यविधिगत तथा नियन्त्रणात्मक व्यवस्था मिलाइ त्यस्तो व्यवस्थालाई समय समयमा अद्यावधिक गर्नु पर्ने वुँदा पनि थप थरिएको छ।

राष्ट्र बैंकले विद्युतीय माध्यमबाट गरीने रकम स्थानान्तरणमा पनि केही वुँदा थप गरेको छ। बैंकहरुले विद्युतीय माध्यमबाट रकम स्थानान्तरण  गर्ने उत्पतिकर्ताको नामसहितका सम्पूर्ण विवरणसमेत राख्न नयाँ निर्देशिकामा व्यवस्था गरिएको छ। 

थपिएको वुँदा अनुसार, उत्पतिकर्ताको खाता नम्बर, खाता नभएको अवस्थामा कारोबार पहिचान हुने सक्ने छुट्टै संकेत नम्बर, यसको ठेगाना, जन्म मिति, जन्म स्थान, नागरिकता, राष्ट्रिय परिचयपत्र वा ग्राहक परिचय पत्र नम्बर राख्नु पर्ने हुन्छ। राष्ट्र बैंकले ७५ हजारभन्दा वढी रकम स्थानान्तरण भएर भुक्तानी दिनु पर्दा ग्राहकको सही पहिचान गर्नु पर्ने व्यवस्था थप गरिएको छ।